Ламар Одом, поранешниот кошаркар на ЛА лејкерс, на 41 година започнува боксерска кариера. Одом потпиша договор со телевизиското шоу на „ФОКС“, Селебрити боксинг, по што првата борба му е закажана за 12 јуни во Атлантик сити.
Засега не е познат противникот на Одом, но сигурно ќе биде уште една славна личност која има желба да се проба во боречките вештини.
Инаку, само пред шест години Одом го допре дното и за малку ќе го загубеше животот од предозираност со дрога. Пороците ги остави зад себе и постепено му се враќа на нормалниот живот.
„Се обидувам да се одвикнам од порно и блага храна. Се трудам да бидам подобар човек“, посочи Одом.
Инаку, некогашниот крилен центар на Клиперс, Далас и Мајами највпечатливите моменти во кариерата ги запиша како играч на ЛА лејкерс, со кои освои два шампионски прстени во 2010 и 2011 година.
