Франција ја забележа првата победа во втората фаза по групи на Европското првенство во ракомет за жени, а бодовите се освоени со триумф од 29:23 против Данска.
Во вториот меч денеска од првата група Црна Гора со 30:28 ја победи Шведска и се врати во битка за евентуален настап во полуфиналето.
Естел Нзе Минко беше незадржлива кај Французинките, кои се организатори на шампионатот, и со 7 голови ја предводеше својата репрезентација до бодовите против Данска. Поранешната Вардарка Алисон Пино постигна 4 голови, а одлични беа и нејзините некогашни колешки од Вардар, Сираба Дембеле и Лакрабер.
Со десетка на блескавите моменти од ерата на моќниот Вардар потсети и Јованка Радичевиќ. Крилото на Црна Гора беше недофатлива за одбраната на Шведска, заедно со Мајда Мехмедовиќ, која постигна 7 голови.
Црногорките ги освоија првите бодови во новоформираните групи и ги вратија шансите за подвиг и пласман во полуфиналето.
