Новак Ѓоковиќ се пласираше во осминафиналето на Вимблдон, откако во меч кој траеше три часа, со 3:1 во сетови го победи Артур Риндеркнеш од Франција. Ова беше прв меч на овие двајца тенисери, а Ѓоковиќ кој е повеќе од една деценија постар, покажа дека уште е во добра форма и посебно инспириран кога игра на неофицијалното светско тениско првенство.
Во првиот сет се водеше голема борба. Двајцата тенисери на почетокот загубија по еден гејм на свој сервис, па резултатот беше 5:5. Тогаш Ѓоковиќ одигра одлично на сервис на противникот и направи брејк кој беше клучен за да го освои сетото со 7:5.
Вториот сет временски траеше речиси идентично како првиот, а само еден брејк беше доволен за Србинот да стигне до 2:0 во сетови. Клучниот момент се случи кога Ѓоковиќ го брејкна Французинот за 2:1, а потоа поведе со 3:1 и до крајот ја сочиува предноста за конечни 6:4 и водство од 2:0.
Во третиот сет Србинот како да ја загуби силата. Риндеркнеш го диктираше темпото и освои пет гејма по ред. Потоа Ѓоковиќ освои еден гејм за да не се случи за прв пат во 20-гоишната кариера на Вимблдон да загуби сет без освоен гејм. Французинот убедливо со 6:1 го освои овој сет и најави борба и во четвртиот сет.
Во четвртиот сет двајцата тенисери беа сигурни на свој сервис и стигнаа до 6:6, па мораше да се игра тај-брејк. Тоа е поле на кое Ѓоковиќ е многу силен и на крајот го доби тај-брејкот со 7:4 за победа од 3:1 во сетови.
Во осминафиналето се пласираше и Јаник Синер кој со 3:0 во сетови го победи Американецот Џенсон Бруксби и тоа по сетови со 6:4, 6:3 и 6:3. Интересно е дека Ѓоковиќ и Синер буквално во иста минута ги завршија дуелите со своите ривали.
