Манчестер јунајтед за првпат сезонава не успеа да постигне гол на еден официјален натпревар, па Црвените ѓаволи мораа да се задоволат само со 0-0 против Челзи во премиерлигашкото дерби. Тимот од Манчестер на првите три домашни меча сезонава во Премиерлигата немаат победа, и тоа е прва нивна ваква црна серија во последните 47 сезони.
Деби во дресот на Јунајтед имаше Уругваецот Единсон Кавани. Популарниот Еди има 33 години и 253 дена, со што е втор најстар дебитант кој се појавил Премиерлигата после Златан Ибрахимовиќ кој во англиското првенство првпат заигра на возраст од 34 години и 316 дена.
Јунак на гостите беше голманот Едуард Менди кој имаше неколку одлични одбрани. Сините не победиле на „Олд Трафорд“ на последните осум гостувања.
