Мајами Хит и официјално го потврди ангажманот на Јанис Адетокумбо, двократниот МВП на НБА-лигата, во трансфер што се смета за еден од најголемите ова лето. Грчката суперѕвезда по 12 сезони го напушта Милвоки бакс и кариерата ќе ја продолжи на Флорида.
Зделката беше официјализирана на 6 јули, денот кога и официјално започна преодниот рок во НБА. Иако американските медиуми со недели пишуваа дека трансферот е практично договорен, сега тој доби и официјална потврда.
Во замена за Адетокумбо, Милвоки бакс ќе добие неколкумина кошаркари, како и идни избори на НБА-драфтот. Грчкиот репрезентативец во Милвоки пристигна како 15-ти избор на драфтот во 2013 година, а во 2021 година го предводеше клубот до шампионската титула.
LET’S FREAKIN’ GO!
— Miami HEAT (@MiamiHEAT) July 6, 2026
Welcome to Miami, @Giannis_An34! pic.twitter.com/km0CdVJZYL
Од Бакс емотивно се простија од својот долгогодишен лидер, нарекувајќи го „срцето и душата на клубот“ и „најголемиот кошаркар во историјата на франшизата“, нагласувајќи ја неговата силна поврзаност со градот и навивачите.
Трансферот на Адетокумбо предизвика вистински бран на промени низ НБА. Џејлен Браун се пресели од Бостон селтикс во Филаделфија севентисиксерс, Кавај Ленард ги напушти Лос Анџелес клиперс и потпиша за Торонто репторс, додека Џа Морант го замени Мемфис гризлис со Портланд трејлблејзерс.
Во центарот на вниманието и понатаму останува иднината на Леброн Џејмс. По најавата дека го напушта тимот на Лос Анџелес лејкерс, сè уште не е познато каде ќе ја продолжи кариерата, а неговата следна дестинација е една од најголемите мистерии на летниот преоден рок.
