Англискиот првак Манчестер сити поднесе тужба против судијата Мајкл Оливер за неговиот начин на делењето правда во дербито против Ливерпул, во кое Граѓаните загубија со 3-1 на „Енфилд“. Од таборот на клубот сметаат дека се оштетени и дека самиот Оливер придонесол за поразот од директниот ривал за титулата во Англија, па бараат од ФА и Асоцијацијата на арбитри соодветно да го санкционираат англискиот судија.
Сити бара одговор зошто не бил досуден пенал во нивна корист кога топката удри во раката на Трент Александер-Арнолд, а само 22 секунди подоцна домаќините поведоа со 1-0 бидејќи акцијата не беше прекината. Исто така имало и контакт меѓу Садио Мане и Рахим Стерлинг во шеснаесетникот, а според судијата, тоа не било доволно за најстрога казна.
И покрај тоа што имаше целосно објаснение за сите спорни ситуации, англискиот првак е убеден дека Оливер мора да биде казнет за грешките.
На еден начин, од таборот на Сити се обидуваат да кажат дека не се задоволни од влијанието на ВАР-системот и бараат да се најде решение со цел во иднина да не се прават вакви енормни лапсуси.