Вечерва продолжува финалната серија во кошаркарскиот плејоф кој треба да го даде најдобриот тим во Македонија. Актуелниот првак МЗТ Скопје Аеродром води со 2:0 во победи против Маџари и е на еден чекор од одбрана на титулата. Аеродромци ги добија двата меча во „Јане Сандански“, но Маџари покажа дека не случајно е во финалето.
Маџари минатата сезона играше во Втора лига, а сега е во финалето за титулата во плејофот. На првите два меча Маџари загуби со седум и пет разлика, што значи дека нијансите решаваа, а тие беа на страна на многу поискусните играчи на МЗТ.
Денешната средба ќе се игра во салата „Наум Наумовски-Борче“, билетите се по 100 денари, а за деца влезот е бесплатен. Од Маџари најавуваат дека со помош на публиката може да стигнат до првата победа над МЗТ Скопје Аеродром, кој сезонава се радуваше на сите пет претходни пресметки.
