Баерн Минхен ја пречекува Барселона во супер дербито на денот во Лигата на шампионите. Каталонците станаа омилена жртва на германскиот гигант, кој има четири победи во низа со гол-разлика од 17 дадени и само четири примени гола.
Посебно впечатлива е статистиката на Томас Милер, кој има одиграно седум меча против Барселона, во кои е со биланс од шест победи и само еден пораз. Во овие седум средби, Милер има постигнато дури осум голови, а додаде и две асистенции.
Ако продолжи оваа традиција, Милер вечерва на „Алијанц арената“ сигурно ќе постигне гол против Барселона.
Во слична позиција како Милер е и Един Џеко. Голгетерот на Интер вечерва ќе игра против својот омилен ривал, Викторија П’лзењ. Џеко има постигнато дури девет погодоци против Викторија П’лзењ, па многу веројатно е таа низа да продолжи и сега.
Во дресот на Манчестер сити, Џеко има одиграно два меча против Викторија П’лзењ и дал два гола. Како играч на Рома, Џеко во три меча против ривалот од П’лзењ постигна дури шест погодоци. Еден гол има дадено и во далечната 2006 година, кога настапуваше за Теплице.