Кошаркарот на Портланд трејлблејзерс, Енес Кантер, му испратил порака на легендарниот центар Хаким Олајџувон, од кого побарал совет како да остане на високо ниво на игра во време кога пости и додека има сончева светлина ништо не јаде и пие. Кантер вели дека речиси секоја година пости за време на Рамазан, но сега за првпат пости додека трае плејофот во НБА.
„Пред две години се сретнав со Хаким, а знам дека во минатото, мислам во 1995 година, тој стана МВП на финалето и побарав совет како успеал да пости и истовремено да игра толку добро. Ми даде некои совети, ми кажа што јадел, кога се будел и колку вода пиел за да го држи до вечерта“, изјави Кантер, кој има и друг проблем.
Кантер има и повреда на рамото, па мора да зема и лекови, покрај другото.
„Лековите ги пијам во 4 часот наутро, а потоа вечерта веднаш пред натпреварите“, објаснува Турчинот роден во Швајцарија, кој е персона нон грата во својата земја поради критики кон претседателот Ердоган.