Светското првенство во 2026 година ќе остане запаметено по историски преседан. За првпат од постоењето на мундијалите, меѓу осумте најдобри репрезентации нема да се најде ниту една од трите најтрофејни фудбалски велесили, Бразил, Германија и Италија.
Историскиот момент беше потврден по елиминацијата на Бразил од Норвешка во осминафиналето. Петкратниот светски шампион го заврши настапот пред четвртфиналната фаза за првпат уште од Светското првенство во 1990 година, а последната титула на Селесао и натаму останува онаа освоена во 2002 година во Јужна Кореја и Јапонија.
Германија, која четирипати била светски првак, турнирот го напушти уште во шеснаесетфиналето. Германците беа елиминирани од Парагвај по изведувањето пенали, а нивната последна светска титула датира од 2014 година.
Италија, исто така четирикратен светски шампион, воопшто не успеа да обезбеди место на завршниот турнир. Аѕурите беа елиминирани во баражот од Босна и Херцеговина и по третпат во низа останаа без настап на Светското првенство. Нивната последна титула е од 2006 година.
Трите репрезентации заедно имаат освоено вкупно 13 светски титули, па нивното истовремено отсуство од четвртфиналето претставува јасен показател за промената на силите во светскиот фудбал. Мундијалот во 2026 година ќе добие нова страница во историјата, со разврска каква досега никогаш не е видена.
