Хрватска го победи Јордан со минимални 2-1 во пријателски меч, но кај светскиот вицешампион немаше место за задоволство. Во третиот обид по СП, Хрватите дојдоа до првата победа, но се поставува прашањето кој треба да игра во иднина, а кој не.
Од оние што беа на Мундијалот, фалеа дури 13 играчи и дуелот со Јордан требаше да послужи да се види со што располагаат. Головите против Јордан ги дадоа дефанзивците Вида и Митровиќ.
Она што ги загрижува Хрватите се настапите во Лигата на нациите. Прво зборуваа дека тоа натпреварување не им е важно, а сега уверуваат дека е корисно. Но, ако сакаат да не испаднат во Лига Б, не треба да примаат по шест гола како со Шпанија. На втори декември е ждрепката за квалификациите за ЕП 2020 и не е сеедно на кое место ќе се најдат.
Во Лигата на нациите им остануваат уште дуелите со Шпанија, дома на 15-ти ноември и три дена подоцна гостување во Англија. Шпанците имаат шест бода, Англичаните четири, а Хрватска само еден, но и со меч помалку од ривалите, па со две победи може да биде и првак. Сепак, ако не победи на „Вембли“, веројатно ќе биде последна.
