Резервните кошаркари на Лос Анџелес клиперс приредија вистинско чудо на дуелот против Атланта хоукс и беа иницијалната каписла за големиот пресврт што се случи во последните 17-18 минути за победа од 119:110.
При негатива од 21 поен разлика, тренерот на Клиперс, Тајрон Лу, повлече очајнички потег и ги седна на клупа сите стартери, а во игра влегоа пет резерви. До крајот на третиот период имаше шест и пол минути и белото знаме на домаќините доби поинакви победнички бои.
Петорката Ман, Батум, Патерсон, Кенард и Кофи одиграа брилијантна одбрана и направија разлика од 21:10 до крајот на третата четвртина, а потоа продолжи доминацијата на Клиперс.
Домаќините ја добија последната четвртина со 37:20 и победија со 9 поени разлика, иако во еден момент имаа и негатива од 22 поени, 66:88.
Петте резерви што го иницираа пресвртот заедно постигнаа 50 поени.
„Сакав да видам играчи што ќе се борат. Секоја чест за резервите, одиграа неверојатна партија баскет и завршија пеколно добра работа“, изјави Лу по мечот.
Од моментот кога беа заменети сите пет стартери, предводени од големите ѕвезди Ленард и Џорџ, Лос Анџелес клиперс ги надигра гостите со 53:22.
Во еднакво возбудлив меч, Мемфис гризлис предводени од атрактивниот Џа Морант успеа да го победи Бостон селтикс со 132:126 по едно продолжение.
Морант беше прв стрелец со 29 поени, а имаше два исклучително атрактивни потези во победата против фаворитот од Источната конференција.
Резултати: Кливленд – Сакраменто 105:119, Минесота – Оклахома 103:112, Сан Антонио – Шарлот 97:100, Чикаго – Јута 95:120, Хјустон – Торонто 117:99, Мемфис – Бостон 132:126 по едно продолжение, Милвоки – Индијана 140:113, Л.А. Клиперс – Атланта 119:110.
