Реал Мадрид за првпат по 40 години мина летен преоден рок без да ангажира ниту еден нов играч. Кралевите мируваа во трансфер прозорецот кој заврши дури вчера, а последен пат кога Кралевите ја чуваа касата затворена беше во летото 1980 година.
Оттогаш, па досега 13-кратниот европски првак купувал барем по еден играч во текот на летниот преоден рок. Сепак, по сите случувања со пандемијата со корона-вирусот, која удри по финансиите и на најголемите фудбалски гиганти, Кралевите одлучија да не се залетуваат по трансфери и да ги чуваат средствата за идната година.
Прекомандувањето на Мартин Одегар и Алваро Одриосола во првиот тим се освежувањата за екипата на Зидан, додека Реал успеа да се ослободи од Герет Бејл, Серхиo Регилон, Брахим Дијаз, Ашраф Хакими, Хамес Родригес и Оскар Родригес за вкупна сума од 84 милиони евра.
Во меѓувреме, парите ќе се чуваат за галактички трансфер на Килијан Мбапе, првата желба на претседателот Перес, но и на Зинедин Зидан. На младата ѕвезда на ПСЖ веќе извесно време му се предвидува преселба во шпанската престолнина, што е и негов сон, па затоа мирувањето е стратешки потег на Кралевите за во летото 2021 да атакуваат со сите сили по потписот на светскиот првак.
