Родри покажа спортски гест по големата победа на Шпанија над Португалија (1:0) во осминафиналето на Светското првенство 2026. Шпанскиот репрезентативец јавно му се извини на својот поранешен соиграч од Манчестер сити, Бернардо Силва, по ситуацијата која предизвика тензии во финишот на натпреварот.
Во разговор со медиумите во микс зона на стадионот во Далас, Родри призна дека неговата реакција по промашувањето на Бернардо не била соодветна. Шпанскиот играч од средниот ред беше избран за најдобар фудбалер на натпреварот, но најголемо внимание привлече неговото однесување во еден момент од дуелот.
Сцената се случи откако Микел Мерино го постигна единствениот гол на натпреварот. Бернардо Силва имаше голема можност да израмни со удар со глава, но не успеа да погоди, а прославата на Родри по неговото промашување веднаш го налути португалскиот фудбалер. Бернардо му пријде и со гестикулација му стави до знаење дека не му се допаднала неговата реакција.
هذا كان السبب في غضب بيرناردو سيلفا
— خالد بن فصلا | KF (@wlv_s1) July 7, 2026
رودري احتفل امام بيرناردو سيلفا زميله السابق في مانشستر ستي
pic.twitter.com/xG9SkQmeEG
Сепак, по завршувањето на натпреварот, Родри реши да ја смири ситуацијата и да му упати јавно извинување.
„Прво сакам да му се извинам бидејќи не постапив правилно кон мојот поранешен соиграч. Тоа беше спонтана реакција во моментот, но сфатив дека не беше во ред. Му побарав прошка и сакам повторно да го направам тоа јавно“, изјави Родри.
И покрај индивидуалното признание, шпанскиот репрезентативец смета дека наградата за играч на натпреварот повеќе му припаѓала на стрелецот на победничкиот гол.
„Јас би му ја дал наградата на Мерино. Кога некој влегува во натпреварот со вистински менталитет, заслужува признание. Напорот на целиот тим беше неверојатен и оваа победа е заслуга на сите“, додаде Родри.
