Сантијаго Солари до продолжението на сезоната во шпанското првенство мора да најде решение за покривање на празнината со отсуството на Касемиро. Бразилецот кој е важна алка во реаловиот синџир, поради повреда ќе биде отсутен најмалку еден месец.
Зинедин Зидан го користеше Тони Крос, а некогаш Матео Ковачиќ или Маркос Љоренте, а на 18-те меча без Касемиро, Реал имаше дури 14 победи (гол разлика 53-21), иако ниту еден тренер на Реал не би сакал состав без играчот кој најмногу трча и помага во средниот ред и одбраната.
Крос неодамна кажа дека не е Касемиро, и оти од него не може да се очекува да игра толку добро на таа деликатна позиција. Против Селта, по повредата на Касемиро, на негово место влезе Дани Себаљос, и одигра добро, но дали може така да игра и во континуитет, се прашува Солари.
Солари ќе има три дена за подготовка со целиот тим за дуелот со Еибар, и веројатно ќе му даде доверба на Себаљос, кој е технички поткован и доста трча, но ја нема цврстината во одбраната. На Касемиро би требало да сметаат за Светското клупско во декември во Абу Даби.