Дардан Дехари сам ќе го носи македонското знаме утре на отворањето на Зимските олимписки игри во Пекинг откако поради ковид отпадна варијантата за двајца знаменосци, комбинација која ја вклучуваше и олимпијката Ана Цветановска.
Од македонскиот олимписки комитет објаснија дека Цветановска имала контакт со својот тренер Борче Јовановски, кој е сместен во ковид-центар со позитивен тест на ковид-19.
Цветановска ќе треба да настапи задутре, во крос-кантри трката на 7,5 километри слободно и 7,5 километри скијатлон и на 10 февруари на 10 километри класичен стил.
Знаменосецот Дардан Дехари ќе има две трки во алпско скијање и најпрво ќе биде учесник во слалом трката на 13 февруари и три дена подоцна и во велеслалом.
Третиот македонски олимпиец, Ставре Јада во крос-кантри трките ќе настапи во спринт слободно 1,5 км на 8 февруари и во маратонот на 50 км слободно на 19 февруари.
