Директорот на Удинезе, Пјерпаоло Марино го обвини спортскиот директор на Јувентус Фабио Паратичи дека вршел притисок врз главниот судија на вчерашниот меч во Удине. Јувентус го победи Удинезе со 2:1 и тоа благодарение на двата погодци на Кристијано Роналдо во последните 10 минути од мечот. Домаќините водеа на полувреме, имаа предност до 83 минута, а на крајот си заминаа без бодови.
Првиот гол што Роналдо го даде за 1:1 беше постигнат од пенал, откако по еден изведен слободен удар, топката случајно удри во раката на домашниот играч Родриго де Паул. Судијата досуди пенал, а Роналдо беше прецизен. Португалецот погоди и во 89 минута за комплетирање на пресвртот и три бода за Јувентус, кои се многу значајни во трката за место кое води во Лигата на шампиони.
„Од слободниот удар на Роналдо, Јувентус доби пенал, а не требаше да има ни фаул. Наводно имало прекршок од Ларсен врз Куадрадо, а всушност играчот на Јувентус направи фаул. Значи Јувентус доби пенал по изведен слободен удар кој воопшто не постоеше и не требаше да биде досуден. Јас имам многу искуство со тие работи. Главниот судија на полувремето беше вербално нападнат од Паратици, а тука влијаеа и тренерот и играчите на Јувентус. Тие работи сигурно имаат влијание на неговите одлуки во вториот дел“, рече директорот на Удинезе, Марино.
Удинезе и покрај поразот е сигурен на средината од табелата и на четири кола до крајот има осум бода повеќе од Беневенто кој е во зоната за испаѓање.
