Македонската фудбалска репрезентација денеска ги започна подготовките за последните два меча од квалификациите за пласман на Светското првенство во Катар следната година. Македнија уште е во игра за второто место, кое носи бараж за на Мундијалот, па играчите веруваат дека може да се стигне до посакуваната позиција.
Македонија в четврток ќе гостува во Ереван кај Ерменија, селекција која исто така има свои калкулации за второто место. Сепак, ниту Македонија ниту Ерменија не се во пол-позиција затоа што Романија ги има сите адути во свои раце за да заврши втора во групата.
По дуелот со Ерменија, Македонија в недела ќе игра против Исланд. Младиот напаѓач Бојан Миовски верува дека чуда се случуваат и дека нашата репрезентација нема да се откаже од трката за второто место.
„Имаме теоретски шанси да бидеме на второто место, но не зависи само од нас. Сепак, ние ќе го дадеме максимумот за да се обидеме да освоиме шест бода и да се надеваме дека по неделниот меч, ние ќе бидеме на второто место во групата. Имаме квалитетен состав. Ќе ја анализираме играта на Ерменија за да видиме кои се нивните лоши страни и ќе се обидеме да ги искористиме тие шанси, па и да стигнеме до победа. Романија е со најголеми шанси за второто место, тука сме и ние, но и Ерменија. Ние нема да се откажеме додека постои шанса за второто место“, изјави Бојан Миовски.
