Фудбалот е спорт кој маѓепсал многумина низ целиот свет, а еден од нив секако е Влатко Гроздановски. Поранешниот македонски репрезентативец од најмала возраст се има сретнато со фудбалската топка и уште ја нема оставено. Речиси 20 години траеше неговата играчка кариера, а веднаш потоа продолжи во тренерските води и е дел од многу успешни проекти.
Токму затоа, Гроздановски ја има честа да биде првиот наш гостин во новата сезона од рубриката „Хуманитарен тикет со Sport Life“ и тоа во период кога има премногу работа и обврски, но сепак издвои време да се обиде да состви тикет, кој доколку биде добитен, средствата ќе бидат донирани во хуманитарна цел.
УСПЕШНО РАБОТИ СО КАДЕТИТЕ НА ВАРДАР, ШКОЛАТА „ГРОЗДАНОВСКИ“ ЕДНА ДЕЦЕНИЈА ВАДИ КВАЛИТЕТНИ ДЕЦА
„Нема одмор ниту во лето. Имам многу ангажмани и на сите треба да им се посвети доволно внимание за да се биде успешен“, вели Гроздановски кој како тренер на кадетскиот тим на Вардар во последното одиграно коло победи со 2:0 на гости во Струмица против Брера.
Гроздановски речиси една деценија го работи и проектот „Фудбалска школа Гроздановски“, а е и главен во организацијата на традиционалниот Илинден куп кој ќе се игра во септември.
„Во школата функционираат сите генерации од 6 до 15 години. Ова е деветта сезона. Тренинзите се одвиваат на три локации и тоа во Илинден, Орце николов и АРМ стадионот. Нашата школа е една од помасовните и подобрите. Имаме и неколку шампионски генерации, но најважно е да пласираме квалитетни фудбалери по клубовите, тоа е најголемата награда и трофејот. Досега имаме пласирано преку 40 деца во младинските, кадетските и дел од први екипи“, задоволно коментира Гроздановски.
НА ИЛИНДЕН КУПОТ ЌЕ ИМА 214 ЕКИПИ МЕЃУ КОИ СЕ И АНДЕРЛЕХТ, БРИЖ, ЦРВЕНА ЅВЕЗДА, ПАРТИЗАН, ДИНАМО ЗАГРЕБ, ФЕНЕРБАХЧЕ, БЕШИКТАШ…
Третото издание на Илинден Купот е за помалку од 20 дена, а ова дефинитивно е најмасовното детско фудбалско натпреварување кај нас. Оваа година ќе учествуваат дури 214 екип во шест различни категории.
Учеството го потврдија клубови како Андерлехт, Клуб Бриж, Црвена Звезда, Партизан, Динамо Загреб, Фенербахче, Бешикташ, Вардар и многу други клубови и академии од Блаканот и Европа. Ќе има екипа дури и од Азербејџан.
„Првата година на Илинден купот учествуваа 105 екипи, а сега за само две години, ова бројка е двојно поголема. Едноставно прерасна во моќен турнир, со многу познати екипи не само од регионов туку од цела Европа. Од Македонија ќе има екипи од 16 града. Дефинитивно ова е најмасовниот турнир кај нас, а за тоа дали е најдобар нека зборуваат другите. За да биде се во ред, овој турнир бара сериозна организација која трае неколку месеци“, објаснува Гроздановски, потенцирајќи дека одговорноста е голема, но на крајот огромно е задоволството кога сѐ ќе заврши како што треба.
ОСТВАРУВАЊЕ НА СОНОТ БИ БИЛО МАКЕДОНИЈА ДА СЕ ПЛАСИРА НА СВЕТСКО ПРВЕНСТВО
Гроздановски како фудбалер имаше одлична кариера. Пет пати беше шампион со Вардар, а има и интернационално искуство. За репрезентацијата на Македонија одигра 50 меча и постигна четири гола. Тој и сега е дел од националниот тим затоа што е дел од стручниот штаб на селекторот Благоја Милевски. Македонија моментално е прва во групата во квалификациите за пласман на Светското првенство во 2026 година, а следен предизвик ќе биде да се освојат трите бода против Лихтенштајн на мечот кој е закажан за 5 септември во Скопје.
„Македонија е во борба за прво местото место во групата. Преку Лига на нации речиси 99 отсто имаме обезбедено бараж за Мундијалот, па затоа второ место во групата од квалификаците не менува многу. Да не звучи нескромно, но ние имаме обезбедено бараж“, вели гроздановски кој потенцира дека секој нареден меч е најважен и на секој ривал мора да му се пристапи со максимална почит.
„Сега се фокусираме за дуелот против Лихтенштајн, затоа што секој меч е многу важен. Не смееме никого да потцениме, затоа што сите знаат да играат фудбал. Упте имаме шанси за првото место и ќе се бориме. Знаеме дека потоа не очекуваат и дуели со феноменални селекции како Белгија и Велс, но ние на мечевите во Скопје покажавме дека Македонија може да парира на секој противник“, додава Гроздановски.
ФК ИЛИНДЕН ДА СОЗДАДЕ ТИМ И АКАДЕМИЈА КОИ ЌЕ РАСТАТ ВО ИДНИНА
Во низата на многу ангажмани, најнов предизвик за Влатче ќе биде ФК Илинден, екипа која е дел од најниското по ранг натпреварување, регионалната лига. Од неодамна, Гроздановски заедно со Никола Ѓошевски се задолжени за спортскиот дел на овој клуб кој треба да заживее повторно.
„Прифатив со моето искуство да помогнам во ФК Илинден. Имам одлична соработка со општината. Тука се и луѓето од Sport Life кои решија да инвестираат во овој проект. Ќе бидам како советник. Клубот моментално е речиси згаснат. Почнуваме од општинска лига Гази Баба, а целта е да направиме добар клуб, кој ќе оди скалило напред“, открива Гроздановски.
Планот за ФК илинден е да се формира младинска школа ФК Илинден, од која ќе произлегуваат идните фудбалери на клубот, но и да се оди ранг погоре во следната сезона.
Гроздановски на крајот потенцираше дека не се обложува, но секако дека прати европски ис ветски фудбал, а неговиот избор за добитен тикет е овој.
