Тежок инцидент се случи на меч од Серија Д во Италија, а животот на судијата Бернардини висеше на конец. На дуелот меѓу Виртус и Атлетико Торанова тој беше нападнат од двајца хулигани, кои се таканаречени симпатизери на домашниот тим, а атакот можеше да биде кобен.
Еден од нив го удрил судијата со цигла по глава, па Бернардини паднал во бесознание. Се спаси благодарение на брзата интервенција на масерот на гостинската екипа, Јури Алвити.
Алвити е поранешен затвореник и член на злогласната десничарска група на навивачи на Лацио позната како Иридучибили.
На помош му пристигнала и вереницата на Бернардини, која е медицинска сестра, па со заеднички сили успеале да му го спасат животот на нападнатиот судија.
Тој ја минал ноќта во болница, но нема сериозни последици од нападот.
