Во таборот на ПСЖ пристигнаа добри вести, повредите на Нејмар и Мбапе не се сериозни. По првите лекарски прегледи, од медицинскиот тим на Бразил излегоа информации дека Нејмар имал болки во препоните, а мечот против Камерун го напуштил со цел да не дојде до поголем проблем.
Ќе му бидат потребни неколку дена за да ја надмине повредата, а се претпоставува дека ќе биде подготвен за дуелот со Ливерпул во Лигата на шампионите закажан за 28-ми ноември. Бразилецот се огласи преку социјалните мрежи дека повредата не е сериозна, а слична е ситуацијата и со Мбапе.
Французинот се здоби со болки во рамото на пријателската пресметка против Уругвај, но селекторот Дидие Дешамп ги смири страстите откако потврди дека се работи само за обичен удар.
„Килијан почувствува болки во рамото по неговиот пад, но не се работи за посериозна повреда. Мислам дека не се работи за кинење на мусклул или лигамент, ќе потврдат дополнителните прегледи“, истакна Дешамп.
Дуелот против „црвените“, кој ќе се игра на „Паркот на принцовите“, може да биде одлучувачки за двете екипи во борбата за пласман во нокаут-фазата од ЛШ. Во групата Ц, Ливерпул и Наполи имаат по шест бода, пет има ПСЖ, додека Црвена ѕвезда е на четвртото место со четири бода.
