Андреа Пирло во првата сезона како тренер на Јувентус има големи проблеми. Старата дама, која девет години доминира во Серија А, сезонава заостанува 10 бода зад лидерот Интер. Пирло е играчка легенда на клубот, но кога се работи за тренерската работа, повеќе од сигурно е дека има недостатоци.
Одбраната на Јувентус е одлична и е најдобра во Серија А. Старата дама има само 20 примени погодоци, но проблем е офанзивниот ред. Во 23 меча дадоа вкупно 45 гола, од кои 43 отсто се на Кристијано Роналдо (Португалецот даде 19 гола).
Сепак, тоа што е најголем проблем за Јувентус сезонава е тоа што дури четири пати италијанскиот првак испушти предност и на крајот наместо три бода, освои само еден. На последниот меч против Верона, Јувентус имаше предност од 1:0, но на крајот заврши 1:1 и фаворитот освои само еден бод. Тоа на Јувентус му се случуваше и во дуелите против Лацио, Беневенто и Аталанта, кога не успеваше да ја сочува предноста.
Ако успееше Јувентус на овие четири средби да ја сочува предноста, сега ќе имаше осум бода плус на своето конто и веќе ќе беше во трка за титулата, а сега има двоцифрено заостанување, но и меч плус за играње.
