Денвер нагетс никогаш претходно во историјата немал поубедлива победа во дуелите со Лос Анџелес лејкерс од тоа што ги победи ноќеска. Со одлична игра во второто полувреме, Денвер стигна до триумф од 117:85, во меч на којшто триото Пол Милсап, Џемал Мари и Малик Бисли дадоа по 20 поени.
Првото полувреме не покажуваше дека Лејкерс ќе доживее таков дебакл. Денвер имаше контрола на резултатот и предност, но само од осум поени по 24 минути игра (58:50). Во второто полувреме Денвер заигра уште подобро, додека најдобриот играч на Лејкерс, Леброн Џејмс, имаше слаб шут. Џејмс погоди пет од 15 шута и заврши со скромни 14 поени.
Најдобриот тим во лигата, Торонто, стигна до шестата победа во низа, а вкупно 18-та во 22-риот меч, откако на гости го победи Мемфис со 122:114.
Резултати: Детроит – Њујорк 115:108, Мајами – Аталанта 113:115, Мемфис – Торонто 114:122, Денвер – ЛА лејкерс 117:85, Феникс – Индијана 104:109.
