Динамо Загреб вечера гостува кај Вилјареал во реванш-дуелот од четвртфиналната фаза во Лигата на Европа. На „Мадригал“, Модрите ќе се обидат да надополнат негатива од 0-1, а тренерот Дамир Крзнар верува дека може да се избори за пласман во полуфиналето бидејќи за овој меч ќе смета на еден од неговит главни адути, Аријан Адеми.
Иако македонскиот репрезентативец и капитен на Динамо се здоби со повреда на ногата изминатиов викенд, Крзнар потврди дека Адеми е здрав и подготвен за настап, па ќе се најде на теренот од првата минута. Она што го загрижува стратегот е напаѓачот Бруно Петковиќ, кој не е подготвен за 90 минути, но можеби ќе изненади со составот.
„Адеми е здрав и подготвен да игра, што е одлично за нас. Петковиќ има проблеми, но со блокада ќе може да биде во конкуренција за настап. Немаме време за експерименти, ќе излеземе со најдобриот тим на теренот бидејќи имаме квалитет за големи нешта“, посочи Крзнар.
Покрај Адеми, стандарден во почетниот состав ќе биде и нашиот десен бек Стефан Ристовски.
