Ракометарите на Металург и нивниот тренер Данило Брестовац се пожалија дека Војводина играла доста грубо и тоа придонело за поразот во мечот од СЕХА-лигата, а доказ за нечистата игра на новосаѓани се скинатата аркада на Јагуриноски и пукнатиот нос на Пучник.
По гостувањето кај Војводина, „металурзите“ не се вратија дома, туку од северот на Србија продолжија накај Словачка, каде што утре играат натпревар од Лигата на шампионите против Татран Прешов.
„Верувам дека натпреварот во некои моменти беше премногу груб. Според моето мислење, противниците играа премногу агресивно. Честитки за Војводина за победата, но, повторувам, тие беа премногу агресивни во обидот да го компензираат фактот дека не можеа да сметаат на пет повредени играчи“, рече Брестовац.
Со тренерот се согласи и Александар Шпенде.
„Војводина беше доста агресивна во одбраната и ние не можевме да одговориме на тоа. Постигнавме 30 гола, но на крајот сепак загубивме. Чувствувам дека треба да поработиме и на офанзивниот и на дефанзивниот дел од нашата игра“, изјави Словенецот.
