Најпопуларниот играч на снукер на светот, Рони О`Саливен, со 6:1 го совлада Џек Лисовски и се пласира во четврт-финалето на Отвореното првенство на Обединетото Кралство, еден од најценетите турнири на светот.
Со победата, Англичанецот си го честиташе својот 43-ти роденден. Лисовски поведе со 1-0 во фрејмови, но потоа заигра послабо, а „ракетата“ покажа кој е кој и на противникот му немаше спас. Во четврт-финалето, Рони ќе се сретне со Динг Џунхуи или Мартин О`Донел, меч кој се игра утре.
Доколку ја одбрани титулата во Јорк, О`Саливен ќе дојде до рекорден седми трофеј од овој ценет турнир (сега го дели првото место со Стив Дејвис). О`Саливен сега има 17 четврт-финалиња на овој турнир.
„Уживав во играта. Уште не сум во најдобра форма, ми треба време, но на добар пат сум. Супер нервозен сум, но барем ја имам постојаноста. Сè додека сум компетитивен, кај мене ќе го има гладот за играње“, изјави петкратниот светски првак.
