По Владата и Агенцијата за млади и спорт, кои вчера објавија финансиска награда за Дејан Георгиевски, кој освои сребрен медал на ЛОИ во Токио, денеска и од Олимпискиот комитет објавија каква награда ќе му додели на 22-годишниот борец кој ја израдува нацијата со најголемиот успех и прв сребрен медал за Македонија.
„Олимпискиот комитет на С. Македонија, кој и досега севкупно ги финансираше сите подготвителни активности на Таеквондо репрезентативците на најпрофесионален начин, има задоволство дополнително да даде и финансиска награда за најзаслужниот за овој извонреден успех, кој е круна на повеќегодишната систематска работа на стручниот штаб сесрдно подржан од Олимпискиот комитет. Финансиската еднократна награда ќе изнесува 10.000 евра за Дејан Георгиевски. Дополнително, Олимпискиот комитет ќе обезбеди максимална стипендија за Дејан за следните Олимписки игри во Париз 2024 во износ од 1.000 УСД месечно“, информираа од МОК.
