Пандев одлучи фудбалски – Стојчев е иднина на Академија Пандев, не е прифатена оставката на тренерот

Горан Пандев го планира тренерот Ѓорѓе Стојчев како долгорочно решение на клупата на Академија Пандев и заедно со Управниот одбор на клубот одлучи да не се прифати оставката што ја понуди тренерот по поразот од Скопје со 1:2 и ремито против Борец 1:1.

Стојчев реагираше веднаш и понуди оставка, но сега струмичани ја одбија.

„Сакаме да ја информираме јавноста дека оставката на тренерот Ѓорѓе Стојчев не е прифатена од Управниот одбор. Тој ја има целосната поддршка на сите во клубот.

Стојчев е долгорочно решение на Академија Пандев и тоа не е случајно. Ние го сметаме за една од најважните алки во градењето на клубот и затоа ја одбивме неговата оставка“, соопштија струмичани.

Претходно нешто слично се случи и со Влатко Костов, кој од поинакви причини, поради судиски грешки на штета на Тиквеш најави дека ќе си замине, но одговори градоначалникот на Кавадарци, Митко Јанчев, на ист начин како сега пандевци.

И Костов и Стојчев ќе продолжат со својата работа во Тиквеш и Академија Пандев најмалку до крајот на оваа сезона.