Феникс санс и Мајами хит загубија во последните натпревари од регуларниот дел на сезоната како две водечки екипи во Западната и Источната конференција, а познати се 12 екипи што сигурно ќе играат во плејофот и уште 8 што ќе разигруваат за уште четири места во доигрувањето преку Плејин-турнирот што ќе почне од утре.
Феникс играше со резерви против Сакраменто кингс и загуби со 109:116 на домашен терен, но ќе ја има пол-позицијата во целиот плејоф, односно правото да игра меч повеќе на свој терен бидејќи со ефект од 64 победи и 18 порази имаат најдобар биланс од сите екипи во НБА.
Пораз што не боли претрпе и Мајами хит во сончевото деби на Флорида од Орландо меџик со 125:111, но и тие го задржаа првото место во Источната конференција и ќе имаат право на еден меч повеќе на домашен терен во плејофот сè до евентуалното финале.
Зад Мајами во Источната конференција се пласираа Бостон селтикс, Милвоки бакс, Филаделфија 76, Торонто и Чикаго на првите шест позиции и веќе се познати и две двојки за првото коло во плејофот.
Шампионот Милвоки ќе игра со Чикаго, а Филаделфија ќе се судри со Торонто.
Мајами и Бостон ја чекаат разврската од Плејин-турнирот што ќе почне веднаш, а меѓусебе ќе играат Бруклин и Кливленд и Атланта со Шарлот.
Победникот од дуелот меѓу Бруклин и Кливленд ќе се пласира во плејофот и ќе му биде ривал на Бостон во првото плејоф-коло.
Победникот од мечот меѓу Атланта и Шарлот ќе игра со поразениот од мечот Бруклин – Кливленд и кој ќе победи на тој меч, ќе обезбеди плејоф и ќе игра против Мајами во првото коло.
Во Западната конференција ќе има два дерби-дуели веќе во првото коло во плејофот.
Далас ќе игра со Јута, а Голден стејт ќе се судри со Денвер. На Плејин-турнирот победникот од мечот меѓу Минесота и Лос Анџелес клиперс ќе игра во првото плејоф коло со Мемфис.
Поразениот од мечот меѓу Минесота и Л.А. клиперс ќе игра со победникот од мечот Њу Орлеанс и Сан Антонио и кој ќе слави, ќе му се спротивстави на Феникс во првата рунда од плејофот во Западната конференција.
Плејин-турнирот ќе се игра од 12 до 15 април, а плејофот почнува на 16 април.
Резултати од последниот ден во регуларниот дел во НБА:
Бруклин – Индијана 134:126, Шарлот – Вашингтон 124:108, Кливленд – Милвоки 133:115, Хјустон – Атланта 114:130, Мемфис – Бостон 110:139, Њујорк – Торонто 105:94, Орландо – Мајами 125:111, Филаделфија – Детроит 118:106, Минесота – Чикаго 120:124, Далас – Сан Антонио 130:120, Денвер – Л.А Лејкерс 141:146 по продолжение, Л.А. клиперс – Оклахома 138:88, Њу Орлеанс – Голден стејт 107:128, Феникс – Сакраменто 109:116, Портланд – Јута 80:111.
