Поразите од Вардар 1961 му пресудија на Жељко Бабиќ на кормилото на Еурофарм Пелистер.
Хрватскиот стратег го напушта кормилото на Битолчани, а одлуката до некаде е очекувана откако загубија од Вардар најпрвин на домашен терен во мечот за титулата во домашниот шампионат. Подоцна, мораа да му честитаат и на најголемиот ривал и за Куп-трофејот, откако загубија во финалето.
„РК Еурофарм Пелистер ја известува јавноста дека спогодбено со тренерот Жељко Бабиќ ја искористи опцијата во договорот за прекин на соработката на крајот на сезоната. По две и пол сезони нашиот клуб ќе добие нов тренер за сезоната 2022/23.
Најискрено му се заблагодаруваме на Жељко Бабиќ за развојот на клубот во претходниот период од 2020 година до денес.
Без негова помош нашиот проект немаше да се развива по предвидениот колосек. Исто така изразуваме благодарност за остварените цели во европските натпреварувања и освоениот Суперкуп на Македонија 2022.
Клубот му посакува многу успех во понатамошната работа и вратите на нашиот клуб секогаш ќе бидат отворени за професионалци како него“ се вели во соопштението на Битолчани.
