Арон Рамзи ги мина медицинските прегледи и тоа во присуство на екипа доктори од Јувентус, која специјално допатува во Лондон и ќе потпише петгодишен договор.
Сега мисијата треба да се заокружи со попуст од Арсенал, а од таборот на италијанскиот првак бараат велшкиот репрезентативец да пристигне во Торино веднаш, во зимскиот преоден рок. Првичниот договор меѓу двата клуба е Арон да игра за лондонските „топчии“ до лето, па потоа да се пресели во Јувентус.
Основната плата ќе му биде 6,5 милиони евра годишно и ќе биде третиот најплатен фудбалер на Јуве, но со бонуси може и да го претрка Паоло Дибала и да биде веднаш зад првата ѕвезда на тимот Кристијано Роналдо.
Рамзи беше еден од најталентираните фудбалери во Англија, но честите повреди и неспортскиот живот го спречија докрај да го презентира раскошниот потенцијал. Има 28 години, а на Јувентус ќе му биде добредојден во средниот ред.
