Фудбалската федерација на Португалија нема намера да му ја исполни желбата на Фернандо Сантош и понатаму да остане селектор по елиминацијата од Мароко на СП во Катар и нивна желба е следен селектор да биде Жозе Мурињо.
За да успеат да го намамат Мурињо со функцијата за која неколку пати истакна дека му е сон, во Федерацијата се подготвени на компромис, односно на „Специјалниот“ да му овозможат да извршува две функции во исто време. Мурињо е актуелен тренер на Рома, но во Федерацијата се подготвени да му дозволат да остане на клупата на Римската волчица во исто време кога би ја предводел и Португалија.
Иако во останатите спортови често се случува селекторот на некоја репрезентација да биде и тренер на клуб, во фудбалот е вистинска реткост и доколку Мурињо прифати да ја води Португалија, ќе влезе во елитно друштво на легендарни фудбалски тренери.
Досега единствени кои воделе и репрезентација и клуб се Виторио Поцо (Италија и Милан), Марио Загало (Бразил и Богафого), Ринус Михелс (Холандија и Барселона), Леонид Слутски (Русија и ЦСКА Москва), Фатих Терим (Турција и Галатасарај), сер Алекс Фергусон (Шкотска и Абердин), Гус Хидинг (Австралија и ПСВ).
