Лионел Меси денеска ќе донесе одлука во кој клуб ќе игра следната сезона, тврди каталонскиот „Спорт“. Според пишувањата, Аргентинецот ќе одлучува меѓу четири клуба, а со донесување на одлуката, Меси ќе стави крај на сите шпекулации.
„Не сака од неговиот трансфер во следниот клуб да се прави сапуница. Сака што е можно порано да го реши тоа и решен е брзо да донесе одлука“, стои во текстот на каталонскиот медиум.
Меси, кој има 35 години, летово е слободен играч откако му истекува договорот со Пари Сен Жермен, што значи дека без никакво обесштетување може да си најде нов клуб. Вкупно четири клуба се во игра, а два имаат подеднакви шанси.
„Во овој момент шансите изгледаат вака: Ал-Хилал има 40 отсто шанси да го доведе Меси. Со исти 40 отсто е и Интер Мајами, додека да се врати во Барселона шансите се 15 отсто. Само 5 отсто е веројатноста дека ќе остане во ПСЖ“, анализира каталонскиот „Спорт“.
Веќе поодамна се најавува дека саудискиот Ал-Хилал му нуди на Меси најголем договор во историјата на фудбалот и Аргентинецот би заработил 1,2 милијарди евра за две сезони. Дејвид Бекам, кој е газда на Интер Мајами, веќе неколку години се обидува да го доведе во САД, а сега има најголеми шанси за тоа, па останува да видиме како ќе заврши ова нагаѓање и прогнози за тоа кој ќе биде клубот чиј дрес Меси ќе го носи во новата сезона.
