Кошаркарската репрезентација на Македонија е поразена и во третиот натпревар на претквалификацискиот турнир за пласман на ЛОИ 2024 во Париз, кој се игра во Талин, Естонија.
Кошаркарите денеска се поразени од Чешка со 94:82 и го освоија последното, четврто место во групата А, со што заврши олимпискиот сон за кошаркарите. Исто така натпреварите во Талин покажаа дека Македонија е веќе далеку од европската елита. Во првиот натпревар Македонија загуби од Израел со 86:65, а во вториот Естонија славеше со 83:59.
Дуелот со Чешка беше и најдобар кој го одиграа избраниците на селекторот Александар Јончевски. На две минути до крајот во втората четвртина, со тројката на Ѓуроски, Македонија поведе и со 37:35, но до крајот на првиот дел Чесите направија серија 10:2 и на одмор заминаа со плус шест (45:39).
Во второто полувреме доминираа Чесите, веднаш направија двоцифрена предност, која ја одржуваа до крајот за конечен триумф од 94:82.
Најдобар кај Македонија беше Ти Џеј Шорст со 27 постигнати поени.
