Третото коло на Првата македонска фудбалска лига се затвора денес крај Охридското Езеро, односно на Градскиот стадион во Струга.
Шампионот Струга Трим Лум помеѓу натпреварите со Свифт Есперанж и Брејдаблик ќе одигра првенствен натпревар против Брера Струмица. Клубот на нашата легенда Горан Пандев имаше одличен старт на првенството и со две победи од два натпревари е на самиот врв на прволигашката табелата, но до овој ефект стигна со две домашни победи против новите прволигаши Вардар и Воска.
За струмичани денешниот натпревар ќе биде вистински предизвик со оглед на тоа дека за противник го имаат шампионот на Македонија и екипата која игра одлично во фудбалска Европа ова лето, Струга Трим Лум.
Стружани досега одиграа само еден меч во првенството, оној против Гостивар, кој го добија со 2-0 на домашен терен. Останува да се види дали тренерот Шпетим Дуро ќе настапи со сите расположливи сили или ќе се чува за историскиот натпревар во четврток против Брејдаблик во Охрид.