Ракометарите на Вардар вторпат во десеттина дена го совладаа најголемиот конкурент на домашната ракометна сцена, Еурофарм Пелистер. После победата во Супер купот во Струмица со 30-26, денес вардарци го совладаа вечниот ривал во првенствен натпревар во СЦ “Јане Сандански“ со 30-25.
Вардар сосема заслужено дојде до победата и во текот на целиот меч имаше водство и диктираше темпо. Домашните одлично го отворија мечот со водство од 6-1, а потоа и 7-2 и 8-3. Еурофарм Пелистер до крајот на првото полувреме успеа само да намали на 15-12.
Второто полувреме започна слично како и првото. Два брзи гола за Вардар за зголемување на водството на 17-12, а потоа домашните имаат и високи +6. Сепак, Еурофарм Пелистер успеа да се врати и да намали на 22-20, но тоа беше се од битолчани на овој меч.
Ракометарите на Вардар рутински го приведоа натпреварот кон својот крај за убедлива победа од 30-25.
