Италијанецот Винченцо Монтела официјално беше претставен пред медиумите како селектор на фудбалската репрезентација на Турција, потврдено е дека со него е потпишан тригодишен договор, што значи дека може да ги води и евентуално на Мундијалот во САД, Канада и Мексико во 2026 година.
Интересно е дека во договорот е вметната една необична клаузула. Секое напуштање на Турција, Монтела ќе мора прво да го најави во Турската фудбалска федерација и да добие дозвола за патувањето.
Во Турција сметаат дека е важно селекторот да живее во нивната земја и постојано да ги следи игрите и формата на репрезентативците. Досегашните селектори на Турција, кои беа странци, не живееја во Турција, но Монтела ќе живее и нема да смее да си оди кога сака.
„Воопшто не се двоумев кога ја добив понудата. Две години живеев во Турција, ги познавам менталитетот и културата кои ме потсетуваат на делот на Италија во којшто пораснав. Тимскиот дух е најважен, мора да бидеме како семејство. Носењето на дресот на репрезентацијата е престиж, одговорноста е голема. Сакам да ги вратиме радоста и среќата кај навивачите и, се разбира, да ги израдуваме бројните Турци кои живеат во Германија со пласман на ЕП во таа земја“, рече Монтела.
