Фудбалската репрезентација на Македонија следниот домашен дуел од квалификациите за Европското првенство против Англија ќе го одигра на новиот хибриден тревник на Националната арена „Тодор Проески” во Скопје.
Веќе е завршено поставувањето на „тепихот”, останува само уште да порасне тревата за тревникот да го добие својот финален изглед.
Како што е веќе познато, новиот тревник на Арената е донација на ФФМ и ќе биде еден од најсовремените. Хибридниот терен, како што се нарекува, значи дека тој се состои од 70% вештачка трева и 30% природна. Ваквиот тревник трајно ќе го реши веќе хроничниот проблем со лошиот терен во Скопје, на кој забелешки имаа сите екипи и репрезентации кои гостуваа, но и нашите репрезентативци.
Првиот натпревар на новиот хибриден терен во Скопје е оној против Англија, кој ќе се одигра на 20 месецов.