Фудбалерите на Сарбрикен приредија вистинска сензација со победата над Баерн Минхен во втората рунда од Купот на Германија. Иако речиси никој не му даваше никакви шанси, третолигашот со 2:1 го совлада Баерн Минхен и се пласира во осминафиналето на Купот.
Баерн поведе со голот на Томас Милер, со што речиси сите помислија дека ќе следува нова убедлива победа на шампионот (викендот славеше со 8:0), но во последните моменти од првиот дел Сонтхајмер го израмни резултатот.
Во второто полувреме, тренерот на Баерн, Томас Тухел, одлучи во игра да ги стави најголемите ѕвезди на екипата, но и тоа не вроди со плод. Играчите на Сарбрикен одлично се бранеа и во 96-тата минута успеаја да постигнат гол преку Гаус за сензационална победа.
Ајнтрахт Франкфурт не го повтори киксот на Баерн и со 2:0 славеше како гостин против Викторија Келн, додека Херта Берлин го елиминира Мајнц откако победи со 3:0.
