Јувентус на свој терен игра против Аталанта во меч на две екипи кои бркаат излез во Европа за следната сезона. До пред еден месец Јувентус беше во трка и за титулата, но Старата дама влезе во криза и на последните шест средби од Серија А освои само пет бода (една победа, две реми и три порази), па тренерот Масимилијано Алегри, алармира дека е време неговиот тим да влезе во позитивна низа и да почне да освојува по три бодови.
„Разочаран сум бидејќи во последниов период освоивме многу малки поени. На последниот меч против Наполи имавме некои добри работи, но на крајот загубивме. Време е да го промениме тој тренд и да почнеме да победуваме. До крајот на сезоната имаме уште 11 меча во првенството и се надевам уште три средби во Купот. Треба целата наша енергија да ја насочиме кон дуелите што ни претстојат. Против Аталанта нема да биде клучен меч, но сепак е важен. Аталанта е сериозен ривал кој истотака се бори да биде во Топ 4. Ќе треба и добро да се браниме бидејќи во последно време лесно примаме голови“, вели Алегри, пред денешниот дуел во Торино кој започнува од 18 часот.
