Фудбалерите на Реал Мадрид синоќа со убедливи 5-0 го совладаа Алавес во меч од шпанската Ла Лига. Тони Крос беше стартер и одигра 72 минути пред да биде заменет, а Лука Модриќ мечот го гледаше од клупата за резервни фудбалери. Двајцата важат за легенди на Кралскиот клуб и навивачите се во исчекување за одлуката на нивната иднина, со оглед на тоа дека договорите им истекуваат на крајот од тековнава сезона.
Хрватот има понуди од САД и Саудиска Арабија, но според шпанските медиуми, тој е решен да остане во Реал Мадрид и да прифати да биде резерва, но и да прифати помала плата.
По натпреварот со Алавес, прашање околу нивната иднина доби и Карло Анчелоти.
„Модриќ и Крос? Клубот и играчите ќе разговараат за нивната иднина по финалето на Лигата на шампионите“, рече Анчелоти.
Финалето од Лигата на шампионите се игра на први јуни на „Вембли“ во Лондон, а Реал за противник ја има Борусија Дортмунд.
