Англиските премиерлигаши денес го играат последното првенствено коло, после кое ќе бидат познати сите непознаници, пред се новиот или старо-новиот шампион. Манчестер сити е во пол-позиција, има два бода предност пред Арсенал и со било каква победа над Вест хем на домашен терен ќе дојде до четвртата титула по ред или вкупно десетта во нивната историја.
„Граѓаните“ првпат станаа шампиони на Англија во 1937-мата година, потоа чекаа 31 година за во 1968-мата повторно да се искачат на тронот, а останатите седум титули се во периодот од 2012-тата до 2023-тата година.
И според квотите Манчестер сити е апсолутен фаворит со квота од 1.10, но не треба да му се одземат шансите на Арсенал, кој на домашен терен игра против Евертон и ќе чека кикс на конкурентот.
Попладнево ќе биде одлучен и последниот учесник во европските купови, но и последната екипа која ќе испадне од Премиер лигата. Со оглед на тоа дека во Англија одлучува гол-разликата, а не меѓусебниот дуел, ситуацијата и тука е лесно предвидлива. Челзи е блиску до пласман во Европа, но со победа и евентуален пораз на Тотенхем, екипата од „Стемфорд бриџ“ може да стигне и до Лигата на Европа. Шанса за Европа чекаат и Њукасл и Манчестер јунајтед, но тешко дека ќе ја видат Европа следната година, но „црвените ѓаволи“ шанса за такво нешто ќе имаат и преку ФА купот, со оглед на тоа дека во финалето играат против Манчестер сити.
Лутон речиси сигурно од следната сезона се враќа во Чемпионшип дивизијата, а тоа нема да се случи само ако има некоја луда завршница и денес да победат со екстремно висок резултат, а таков пораз да доживее и Нотингем, па да ги надополнат 12-те гола разлика, но и трите бода заостанување зад најголемиот конкурент.
