Со хет-трик и асистенција, Лео Меси го режираше пресвртот над Севилја во дербито на 25-тото коло во Ла Лига. Аргентинецот го оствари 50-от хет-трик во својата кариера, на два пати ја поништуваше предноста на Андалужаните, додека му сервираше на Суарес за конечните 4-2 на „Рамон Санчес Писхуан“.
По мечот, капитенот на „каталонците“ посочи дека е презадоволен од начинот на кој неговата екипа се избори за бодови.
„Прикажавме сјајно издание, повторно бевме онаа „стара“, претпознатлива Барселона. Поминавме период во кој, да бидам искрен, не игравме како што знаеме и посакувавме, а тоа многу ни ги отежна работите. Во текот на сезоната мора да се соочите со таквите тешки моменти, но откако го пронајдовме својот ритам, головите сами почнаа да доаѓаат. Секогаш е тешко да се победи на терен од Севилја, така беше и овој пат. Ни направија проблеми со тоа што поведоа, но ние знаевме како да ја свртиме ситуацијата во наша корист“, истакна Меси.
Шпанскиот првак во следните седум дена во два наврати ќе се соочи со вечниот ривал Реал Мадрид. Првото „Ел класико“ (27-ми февруари) е реванш пресметката во Купот на Кралот, каде по првиот меч резултатот 1-1, додека во вториот ден од март Барса повторно ќе гостува на „Сантијаго Бернабеу“, во рамки од 26-тото коло во Ла Лига.
