Најдобриот светски тенисер, Новак Ѓоковиќ, ќе продолжи да го брани трофејот од Ролан гарос, откако после вистински маратон успеа да го победи италијанецот Мусети со 3-2. Мечот започна со големо доцнење во 22:38 часот, а заврши во 03:06 утринава, со што влезе помеѓу топ-10 најдоцна завршени натпревари во историјата.
Србинот до победа дојде со голем пресврт и тоа противник кој е помлад дури 15 години. Ѓоковиќ во првиот сет поведе со 1-0, откако го доби сетот со 7-5, но мечот започна идеално за Мусети кој направи брејк во третиот гејм. Сепак, Ѓоковиќ врати со рибрејк, а потоа и со нов брејк го освои сетот. Вториот сет во тај-брејк му припадна на италијанскиот тенисер, откако Ѓоковиќ пропушти две сет топки за 2-0.
THE DEFENDING CHAMPION SURVIVES A 5-SET THRILLER! #RolandGarros pic.twitter.com/m4GIsBl4SN
— Roland-Garros (@rolandgarros) June 2, 2024
Во третиот сет лоша игра на Ѓоковиќ, два изгубени сервиси и 6-2 за Мусети, кој доаѓа во водство од 2-1. Во четвртиот сет, србинот со фуриозна игра и три освоени сервиси на противникот дојде до убедливи 6-3, а вистинска експлозија следуваше во петтиот сет, кој му припадна на Ѓоковиќ со максимални 6-0.
Лоренцо Мусети во петтиот сет освои само 10 поени и немаше никакви шанси против разиграниот Новак Ѓоковиќ, кој како што одминуваше времето беше се подобар.
За Новак Ѓоковиќ ова е 369-та победа на грен-слем турнирите со што се израмни со Роџер Федерер и сосема сигурно дека ќе го надмине. Овој рекорд на србинот тешко дека ќе биде достигнат во блиска иднина, бидејќи трета на листата е Рафал Надал со 314 победи.
