Килијан Мбапе и официјално потпиша договор со Реал Мадрид и во следните пет сезони ќе игра за Кралскиот клуб. Французинот во Мадрид пристигна како слободен агент бидејќи договорот со ПСЖ му истекуваше летово.
„Пред да започне овој прес, би сакал да кажам неколку работи. Сите ги слушнавте вестите, официјално е, ќе играм за Реал најмалку пет сезони. Тоа е голема чест и остварување на сонот. Многу сум среќен и мислам дека тоа се гледа и на моето лице“, рече Килијан Мбапе на прес-конференцијата пред натпреварот помеѓу Франција и Луксембург.
Сепак, Французинот доби прашање дали бил несреќен во ПСЖ и дали тоа е причината за неговото заминување од Париз.
„Не можам да кажам дека не бев среќен. Имаше работи кои ме правеа несреќен, но не го покажав тоа бидејќи бев лидер на екипата. Никој не го следи лидерот кој покажува слабост. Нема да биде коректно да плукам по ПСЖ и да зборувам лошо. Во животот има работи кои се многу поважни од фудбалот. Луѓето работат во фабрики и заработуваат многу помалку од мене, затоа не е добро јас како Килијан Мбапе да зборувам дека мене ми е лошо“, рече репрезентативецот на Франција.
