Плејмејкерот Илкај Гундоган ќе биде еден од лидерите на Германија на теренот, но и надвор од него.
Фудбалерот од средниот ред на Барселона ја наследи капитенската лента од Мануел Нојер во септември 2023 година, кога голманот беше повреден. На почетокот изгледаше како привремена одлука, но стана конечна со доаѓањето на Јулијан Нагелсман на клупата на Маншафт. Мислењето на Нојер ќе продолжи да има тежина, но Гундоган продолжува како капитен.
Гундоган е роден во Гелзенкирхен и ќе треба да биде спојката која ќе ги обедини сите во тимот.
„Не е важно кој ја носи лентата. Важно е да сме тим, да останеме обединети и секој да има јасна улога. Ако е така, убеден сум дека ќе имаме добро Европско првенство“, изјави Гундоган, кој има турско потекло.
Сепак, според едно истражување на „АРД“, 17 отсто од Германците жалат што капитанот е некој со турски корени.
„Тажно е што сè уште правиме ваков тип анкета и му даваме значење. Добро е што има луѓе како мене на лидерски позиции бидејќи ова ја отсликува новата реалност на Германија. Можеби изгледаме поинаку, но и ние сме Германци“, вели Гундо.
Она во што никој не се сомнева е неговиот квалитет со топката.
Со враќањето на Крос во репрезентацијата, Гундоган си најде нов партнер во средниот ред и нема никаков проблем со тоа.
„Нагелсман слушнал дека враќањето на Тони може да биде проблем за мене, но јасно му кажав дека никогаш не сум имал проблем со него. Напротив. Сакаме да им покажеме на критичарите дека добро се вклопуваме. Ќе преземам поофанзивна улога за тимот“, рече тој.
