Екипата на Реал Мадрид со пораз од Милан ја започна американската турнеја. Самуел Чуквуезе со гол во 56-тата минута го постави конечниот резултат, 1-0 за Милан, на мечот во Чикаго и го расипа дебито на новата ѕвезда на „кралевите“, Ендрик.
Ливерпул со 2-1 го победи Арсенал во премиерлигашкото дерби кое се одигра во Филаделфија. Мохамед Салах во 13-тата и Фабио Карваљо во 34-тата минута погодија за Ливерпул, додека конечните 2-1 ги постави Каи Хаверц во 40-тата минута.
Челзи покажа сила и со убедливи 3-0 ја совлада мексиканска Америка на мечот во Атланта. Нкунку од пенал го отвори резултатот уште во втората минута. На 2-0 зголеми Марк Гују во 21-вата, додека конечните 3-0 беа дело на Мадуеке од пенал во 79-тата минута.
Победа во САД забележа и екипата на Манчестер јунајтед, која со 3-2 го совлада Бетис на пријателски натпревар во Сан Диего. Екипата од Ла Лига поведе во 15-тата минута преку Лосада, но следуваше комплетен пресврт на „црвените ѓаволи“. Рашфорд во 18-тата, Диало во 24-тата и Каземиро во 31-вата погодуваа во мрежата на Бетис за водство на Манчестер јунајтед од 3-1. Конечните 3-2 ги постави Љоренте во 61-вата минута.
