Завршницата на сезоната во Формула 1 започнува со три поврзани тркачки викенди, од кои првиот е Големата награда на Америка во Тексас, на патеката во Остин. Ова е 19-тиот тркачки викенд од сезоната, а воедно и првиот од трите преостанати викенди со спринт трки, што му овозможува на Ландо Норис дополнителна можност за освојување поени во борбата со Макс Ферстапен.
Главната трка носи 25 поени за победникот, со еден дополнителен поен за најбрзиот круг, што значи вкупно 26 поени можни за освојување в недела. Но, спринт трките исто така стануваат интересни бидејќи победникот добива осум дополнителни поени.
Тековната состојба во шампионатот е дека Макс Ферстапен води со 331 поен, но без победа од Големата награда на Шпанија. Зад него е Ландо Норис со 279 поени, што значи дека разликата е 52 поени, доволно мала за да му се закани на Ферстапен. Зад нив се наоѓа Шарл Леклер со 245 поени, а Оскар Пјастри има 237 поени.
„Остин“ е нова патека која се вози од 2012 година, а Тексас стана домаќин на долгочекуваното враќање на Формула 1 во САД. Патеката е инспирирана од познати тркачки патеки, како „Силверстоун“, „Истанбул парк“ и „Хокенхајм“, со конфигурација која нуди возбудливи свиоци и правци. Историски, оваа патека им одговара на болидите на Ред Бул, а Макс Ферстапен има три последователни победи од 2021 година.
Сепак, Мекларен, со силниот замав од неодамнешните победи во Сингапур и Азербејџан, ќе биде сериозен конкурент. Разликата меѓу Мекларен и Ред Бул во конструкторскиот шампионат е 41 поен, а и Ферари и Мерцедес исто така носат нови надградби и стратегии за овој тркачки викенд.
