По комплетирањето на третото коло во новиот формат од Лигата на шампионите, табелата делува по малку необично. Астон вила, која повеќе од 40 години не била дел од елитното европско друштво, е лидер на 36-те екипи. Тимот од Бирмингам има максимални девет бода и уште нема примено ниту еден гол.
Зад Астон вила следуваат уште два клуба од Премиер лигата. Ливерпул исто така е перфектен со девет бода, а Манчестер сити е трет со седум бода. Место во Топ 8 за екипите кои ќе обезбедат директно место меѓу најдобрите 16 има и за француските екипи Монако и Брест, германскиот првак Баер Леверкузен, италијанскиот шампион Интер и португалскиот Спортинг Лисабон. Необично делува меѓу најдобрите да нема ниту една екипа од Шпанија.
Екипите кои се од деветтата до 24-тата позиција ќе играат во плејофот за влез во осминафиналето, а тука се најголем дел од европските гиганти. Сепак, има и такви фаворити кои се во долниот дел од табелата, односно меѓу оние кои би испаднале од ЛШ.
Милан е на 25-тото место кое носи елиминација, а уште послаб е Атлетико Мадрид, кој е на 27-мото место, и Лајпциг на 31-вата позиција. Интересно е дека Баерн Минхен има само три бода и е на 23-тото место на табелата, а пред германскиот гигант е Динамо Загреб, кој досега освои четири бода. Во првото коло токму Баерн испиша историја откако со рекордна победа од 9:2 го победи Динамо, но сега хрватскиот првак е подобро пласиран од европскиот гигант.
