Поранешниот бразилски фудбалер Дани Алвес започна интересен бизнис откако излезе од затвор по 14 месеци и почна да им се враќа на нормалните животни активности.
Бразилецот беше пуштен на условна слобода на 25 март, откако плати кауција од еден милион евра, и сега е подготвен за нови деловни потфати.
Алвес започна бизнис со кој ќе биде пионер на интернетот, лансирајќи платформа наречена Voxtom, со која се надева дека ќе стане милијардер и која директно им конкурира на Tinder, Meta, X и други големи компании во светот на социјалните мрежи.
Dani Alves recupera su vida montando este innovador negocio tras salir de la cárcel https://t.co/xjsGGIXEJ6
— okdiario.com (@okdiario) November 12, 2024
„Дали некогаш сте замислувале да организирате и да најдете секаков вид настани во една апликација? Со Voxtom имате целосна платформа за управување со сè – од мали прослави, како родендени, до големи настани, како концерти и фестивали. Сè што ви е потребно е тука, со практичност и ефикасност за да го трансформирате секој настан во неверојатно искуство“, пишува на веб-страницата на платформата.
Оваа апликација има цел да биде организатор на средби и е лансирана со посебен акцент на бразилскиот пазар. Платформата веќе има 25.000 следбеници на „Инстаграм“ и особено е фокусирана на дружења меѓу пријателите и организирање на забави. Една од основните цели е да ги поврзе луѓето и да им го олесни запознавањето.
Дани Алвес се надева дека ќе има повеќе среќа со овој бизнис отколку со претходните, кои беа поврзани со угостителството. Претходно, тој се обиде во угостителството со рестораните Boteco Fogo и Alquimia Fogo, но брзо беше принуден да ги затвори поради несолвентност.
Инаку, Алвес сè уште официјално нема објавено крај на кариерата, но е јасно дека заврши со играњето фудбал на највисоко ниво. Неговиот последен ангажман беше во мексиканскиот Пумас, а претходно играше за Барселона, Сао Паоло, ПСЖ, Јувентус, Севилја и за Бахија.
Најголем белег остави во Барселона со 408 настапи, а со 43 освоени трофеи во кариерата, тој е еден од најтрофејните фудбалери на сите времиња. За репрезентацијата на Бразил има 126 настапи.
